سرقة فيلا محمد صلاح.. ننشر نص تحقيقات النيابة العامة مع المتهمين
سرقة فيلا محمد صلاح.. أثارت تلك الجملة الجدل في شهر مارس الماضي، إثر تعرض فيلا النجم المصري محمد صلاح، إلى السرقة.
وورد بلاغ إلى النيابة العامة المصرية في الثاني عشر من شهر مارس الماضي، من مدير أعمال اللاعب، باكتشافه سرقة منقولات من فيلا محمد صلاح، والتي تقع في حي مدينتي بالتجمع الأول شرق العاصمة المصرية القاهرة.
وكانت الأجهزة الأمنية ألقت القبض على المتهمين بـ سرقة فيلا محمد صلاح، لاتهامهم بسرقة 4 ريسيڤرات و3 كوتشيات من داخل الفيلا.
وأوضح المبلغ أنه تبين بعثرة بمحتويات المسكن وآثار دخول من نافذته، وسرقة مبلغ نقدي، وميدالية فضية خاصة ببطولة أمم إفريقيا عام 2017، وجوائز تذكارية وملابس رياضية وأجهزة إلكترونية خاصة به.
واتهم 3 أشخاص في سرقة فيلا محمد صلاح لاعب نادي ليفربول الإنجليزي.
سرقة فيلا محمد صلاح.. نص التحقيقات
وجان نص تحقيقات القضية رقم 4262 لسنة 2023 جنح التجمع الأول، والمتهم فيها 3 أشخاص بسرقة فيلا اللاعب محمد صلاح، كالتالي:
قال المتهم الأول "مصطفى.س"، 22 عامًا: "اللي حصل إن أنا كنت شغال في مدينتي من سنتين وبقالي سنة ونص ماشي وكنت مسئول عن 10 فيلل منهم فيلا محمد صلاح، وتعثرت ماديًا بسبب انفصال دون طلاق بين والدي ووالدتي بسبب مشاكل".
وتابع: "بعد كده والدتي راحت قعدت في مكان إيجار وأنا اللي كنت بدفع الإيجار وبساعدها في المصاريف وكنت شغال في شركة ومشيت منها من شهر وفكرت أني أسرق فيلا محمد صلاح وأنا كنت عارف إن هو بييجي الفيلا لما بيكون في ماتشات للمنتخب".
وواصل: "أنا كنت عارف إن الباب الخلفي مكسور وبيتقفل بسيخ حديد فكلمت عادل صحبي وقولتله على الفكرة.. قالص والكاميرات قولتله إن الفيلا مفهاش حد قالي لا أنا مش جاص وبعدها بيومين لقيته بيكلمني بالليل وقالي أنا هاجي معاك نسرق الفيلا وقلتله خلاص نتقابل بكرة الصبح".
وأكمل: "فعلا اتقابلنا تاني يوم الصبح الساعة 11 صباحا ورحت أنا وهو على شارع مصر بالإسماعيلية عشان نبيع التليفون بتاعي عشان مكنش معانا فلوس المواصلات وبعت التليفون بتاعي بألف جنيه وروحنا على الموقف وركبنا عربية السلام واتحركنا من إسماعيلية ووصلنا السلام حوالي الساعة 4 بليل واتغدينا وقعدنا على القهوة شوية وبعد كده ركبنا من السلام لمدينتي".
وزاد: "وصلنا حوالي الساعة 7 بليل عند بوابة 1 مدينتي وفضلنا واقفين لحد ما باص مدينتي جه وركبنا الباص ووصلنا منطقة الفيلل اللي فيها فيلا محمد صلاح ونزلنا هناك وقعدنا شوية في الجناين اللي ورا الفيلا عشان نأمن المكان ونشوف إن مفيش أمن بيعدي".
وأضاف: "لما اتأكدت إن مفيش حد معدي روحت أنا الأول على الباب الخلفي بتاع الفيلا عشان أشوفه ولقيته متصلح وعادل جه ورايا فقالي هنعمل إيه قولتله هنط من على الباب الخلفي والباب فعلا قصير فأنا نطيت ولقيت نور الفيلا منور من جوه واستخبيت في الشجر اللي موجود في الجنينة وبعدها بدقيقة عادل نط وجه ورايا واستخبى لحد ما لقينا مفيش صوت ولا حركة في الفيلا فأنا قولت إن هما سايبين النور مفتوح عشان أي حد يعدي يفتكر إن فيه حد جوا".
وأوضح: "إحنا روحنا على الباب اللي على الجنينة وحاولنا نبص معرفناش فجبنا أنبوبة ووقفنا عليها وبصينا، وعادل وقتها قالي مفيش حد في الفيلا وفيش التلفزيون مفصولة وبعدها لفينا على كل شبابيك الفيلا".
واختتم: "إحنا اخترنا شباك ناحية فيلا مهجورة عشان لو عملنا صوت محدش يسمع، وبعدها دورنا في الجنينة لقينا فاس فحطينا راسها تحت الباب الجرار بتاع الشباك وفضلت أنا وهو ندوس على الإيد الخشب ولقينا سلك الشباك فقطعناه بسكينة المعجون".
انضموا لقناة متن الإخبارية على تيليجرام وتابعوا أهم الأخبار في الوقت المناسب.. اضغط هنا https://t.me/matnnews1
