مجد القاسم: سيد مكاوي قالي لازم تبدأ مشوارك من مصر.. وكنت بستلف فلوس علشان أعمل أغاني

كشف الفنان السوري مجد القاسم، تفاصيل دخوله الوسط الفني وبداية مشواره، مؤكدًا أن الراحل سيد مكاوي من نصحه بالقدوم إلى مصر وبدء مشواره الفني.

وقال مجد القاسم، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": “أنا قبل ما أجي مصر قدمت مرتين على معهد فنون مسرحية ومتقبلتش، ودرست آداب إنجليزي في جامعة دمشق، كنت عايز أدخل الوسط الفني بأي شكل وأنا عارف أن صوتي حلو أوي ولكن مش لاقي فرصة، وكنت بروح الإذاعة والتلفزيون السوري ومش عارف أدخل، وقدمت مسرح ومتقبلتش وقولت خلاص أكمل آداب إنجليزي وأبقى دكتور في الجامعة”.

وتابع: “جاءت صدفة غريبة في حياتي، كان عندنا نقيب الفنانيين فهد بلان، وإحنا كنا في محافظة السويداء اللي هي بلد فريد الأطرش وأسمهان، وجالي تليفون من فهد بلان وقالي هات عودك وتعالى البيت، وعلشان أروح له مكنش في عربية في القرية اللي ساكنين فيها، خدت العود ووقفت مستني أي حاجة تعدي وبعد ما كنت ثلجت عدت عربية جيش وطلعت معاهم ووصلت، ودخلت القصر بتاعه وشوفت عربيات كتير ودخلت وأنا خايف”.

وأضاف: “شوفت عنده فنانين سوريين كلهم وقولت أرجع، قالي تعالى ودخلني عند الفنان الكبير العظيم سيد مكاوي، ومسكت العود وجيت أغني نشزت من الرعب، قالي أنت خايف ليه، وغمضت عنيا ونسيت أنهم موجودين، ومسكت العود وبدأت أقسم صح وبدأوا يسقفوا وغنيت مواويل، واختبرني وكان مبسوط جدًا من موهبتي وكان بياخدني معاه للقعادات الخاصة”.

وأكد مجد القاسم، أن الراحل سيد مكاوي نصحه بالقدوم إلى مصر، قائلًا: “سيد مكاوي قالي أنت هايل ولكن لو فضلت هنا مش هتعمل حاجة، أنت لازم تيجي مصر، وكانت الكلمة دي اللي شقلبت حياتي، وكان عندي حلم أجي على مصر أشوف الأهرامات وأرجع، ومكنش على بالي أجي على مصر وأغني وأبقى مجد القاسم، وهي ترتيبات رب العالمين”.

وكشف مجد القاسم تفاصيل أولى أغنياته لحظة غرام، موضحًا: لما جيت مصر لاقيت شركة قالولي أنت تشتغل النص وإحنا النص، وأنا وافقت ومكنش معايا ولا مليم وقولت ربنا هيرزق، والشركة خلصت الأغاني اللي عليها وفاضل اللي عليا وكنت بستلف من صحابي، والفنان حسام حسني هو اللي وزع لي الأغاني بتاعة الألبوم، ووقتها كانوا بيعملوا مكساج أغنية أعاتبك على إيه ولا إيه بتاعة محمد محيي، وقولتله الأغنية دي هتكسر الدنيا وخدنا تليفونات بعض أنا وهو وبعد 8 شهور لاقيته بيكلمني قالي يا مجد خلصت ألبومك؟ في أغنية عند عصام كاريكا راكبة على صوتك، قولتله أنا جايب أخري، وقالي اسمع الأغنية من عصام كاريكا وكلمته وسمعهالي.

واختتم: واستلفت فلوس من صاحبي وروحنا لـ عصام كاريكا علشان الأغنية وطلب 1500 جنيه، قولتله أنت عارف الظروف وأنا معايا 900 جنيه تاخدهم؟ قالي مبروك عليك وكتبلي التنازل، وسجلنا الأغنية وعملنا الفيديو بالبركة، وسمينا الألبوم لحظة غرام على اسم الأغنية، وكل أغاني الألبوم فرق السما والأرض بين أغنية لحظة غرام، ونزلت الأغنية على القناة الأولى وتاني يوم كنت نجم، مفيش بني آدم كان مش عارفني في الشارع، مكنتش عارف أمشي في الشارع، ربنا اللي مسيرها.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفن.