خميس شعبان عبد الرحيم: أبويا عمره ما ضحك في البيت

تحدث الفنان خميس شعبان عبد الرحيم، عن والده الفنان الراحل شعبان عبد الرحيم، مؤكدًا أنه لا يقلد والده، بجانب الكشف قصة لازمة وإيه الشهيرة في أغاني والده.

وقال خميس شعبان عبد الرحيم، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي":  أبويا عمره ما ضحك معانا في البيت، لو حاجة ضايقته في البيت بينزل الشغل يتحول ويهزر ويضحك، إنما في البيت كان بيقول أنا لو هزرت مع العيال هياخدوا عليا ومش هيسمعوا الكلام، وهو أكمنه صعيدي الضحك مكنش بيطلع منه بسهولة، كانت الناس تضحك وهو لأ مع أن هو اللي مضحكهم.

وتابع: النجاح بتاع أبويا ولا إحنا ولا غيرنا هيعمله، وأبويا كان طيب والعالم كله بيحبه، وكفاية أن إحنا ولاده ده لوحده نجاح، وأنا مبقلدش أبويا أنا كنت تخين وأنا صغير وكنت شكل أبويا، لغاية ما تعبت وعملت عملية وخسيت واتبهدلت، وأبويا كان بيلبسني هدومه ويديني الساعات بتاعته، وكان في كل البرامج بيقول أني بغني زيه بالضبط، وأنا بحب أبويا وممكن أقعد أغني له 20 سنة وأغانيه متخلصش.

أما عن لازمة وإيه الشهيرة، فقال شعبان عبد الرحيم: لازمة وإيه، أبويا حصله حاجات كتير تعرفك أنه لازم ينجح، وعمل شرايط وكان في أغنية فيها لحن أغنية هبطل السجاير اللي فيها لازمة وإيه، وكانت بتعلق مع الناس أكتر من الأغنية، ولو أي حاجة حصلت في العالم يقولوا تلاقي شعبان عبد الرحيم عمل أغنية عن المشكلة.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.