مجدي الهواري لـ "حبر سري": غادة عادل "أم ولادي" ومش لازم الطلاق يبقى فضايح ومشاكل

رد المخرج مجدي الهواري، على حقيقة تصريحه السابق بأن زوجته الجديدة يجب أن تتقبل حبه لغادة عادل قائلا: "الفيديو ساعتها انتشر بمنظور لا تقربوا الصلاة وقلت إن مراتي تحب غادة عادل أم اولادي ومراتي كانت متجوزة ولو أنا مش متقبل إنها تكلم جوزها السابق في شئون ابنتها يبقى أنا راجل مش موزون وطبيعي اختار وحدة موزونة كفاية إنها تتقبل اننا ممكن نتكلم مع بعض بخصوص أولادنا".

وأضاف مجدي الهواري، خلال حواره ببرنامج "حبر سري"، مع الاعلامية اسما ابراهيم، المذاع على قناة القاهرة والناس، أن غادة عادة ما زالت أم اولاده مضيفا: "هي ام اولادي ودي حاجة منقدرش ننساها وأنا اخترت كويس وهما فاهمين بعض كويس والمقصود إنها تتقبل حبي وتقدري ومودتي لأم أولادي ومراتي تشجعني على الود والتقرب من اولادي".

ووجه مجدي الهواري رسالة: "مش لازم الواحد لما يطلق تبقى فضيحة ومشاكل واحنا شخصيات عامة والناس كلها عارفه أخبارنا والحقيقة مفيش حاجة"، مشيرا إلى أنه خلال أول يوم رمضان فطر مع عائلته وتاني يوم فطر مع ابناءه.

أكد المخرج مجدي الهواري، أن نجوم الصف الأول كلهم أبناءه، قائلا: "نجوم الصف الأول كلهم ولادي وأنا فني بدأت صغير وبدأت عمري 23 سنة ومشوار الاعلانات أفادني، ولما بدأت ادخل وانتج ومع أول فيلم خلصته ونزلناه السوق بدأ يجي ايرادات كان فيلم عبود على الحدود".

وأوضح مجدي الهواري، خلال حواره ببرنامج "حبر سري"، مع الاعلامية اسما ابراهيم، المذاع على قناة القاهرة والناس، أنه بدأ الاخراج في سن صغير وكان مواكب جيله من اصحابه الفنانين، مضيفا: "الكيميا بيننا لذيذة واحنا اصحاب قبل الشغل سواء مع علاء ولي الدين أو السقا أو حلمي أو سعد أو رامز جلال وكلهم اصحابي وكنا نستجيب لبعض في تعديلات الشغل وعمري ما ازعل ولا يزعلوا مني وبدأنا مع بعض".

ورد على حقيقة رفض محمد هنيدي تقديم مسلسل من انتاجه، قائلا: "عرضت على هنيدي زي أي منتج مسلسل وأنا أدعي أني بفهم في حتة الكوميدي وهي شغلتني وعرضت عليه مسلسل اسمه المستريح أوي وكنت مراهن أنه يكون مناسب وحلو له وهو رفض ومشوفتش مسلسله الحالي وهتفرج بعد رمضان".