"فاشل وبيستخبى".. نجم الزمالك السابق يشن هجومًا ضاريًا على إدارة الأبيض بعد أزمة زيزو

شن أحمد عيد عبد الملك، نجم نادي الزمالك ومنتخب مصر السابق، هجومًا حادًا على مجلس إدارة القلعة البيضاء بعد أزمة فشل عدم تجديد تعاقد أحمد سيد زيزو.

وكتب أحمد عيد عبد الملك عبر حسابه الرسمي على موقع التواصل الاجتماعي "فيس بوك": "الزمالك بقاله سنين ماشي اليوم بيومه.. مفيش ترتيب للمستقبل بربع جنيه مع تعاقب الإدارات اللي مفيش اختلاف بينها.. ومفيش أي منطق لأي حاجة بيعملوها وبتحصل في النادي.. بتكسب بطولات بالصدفة علشان جمهورك وبيجيلك لاعيبة علشان تاريخك واللي مقومك الجمهور وتاريخ النادي.. يعني مفيش نظام من زمان.. وده اللي بيوصلك للحال اللي أنت فيه.. حتى لما اتعشمنا في ناس المفروض نضيفة جاية تنقلك لمرحلة النظام بعد سنة ونص محدش فيهم موجود.. فالمشهد كله مستخبي.. ومصدرين ناس عندهم رصيد عند الجمهور يشيلوا عنهم".

وأكمل: "مجلس وصل للوضع الحالي في قصة تجديد لاعب عمال يبيع ويشتري في النادي هو وأبوه. ومقدرتش تبيعه في الصيف خوفا من الجمهور".

وتابع: "والنهاردة بتحصد كل ده.. لاعب بيروح للمنافس بكل سهولة.. أنت وهو متخاذلين.. واحد إداريًا صفر والتاني طماع عاوز كل حاجة في الدنيا.. وهو عامل أسوأ موسم ليه وخلى الناس المسؤولة تصدقه.. وتكتب إنه هيجدد ولبسهم مع الجمهور".

وأضاف: "مفيش نادي بيقف على لاعب فعلا.. بس مش كل اللاعيبة بتتعوض.. بقالك 5 سنين بتفقد أهم لاعيبة في إفريقيا.. ومش عارف تعوضهم.. النادي مش هيقفل بس هتاخد بطولة كل فين وفين بالصدفة".

واختتم: "كل حاجة في المتناول.. والرجوع للمنافسة في مصر في المتناول.. مفيش حاجة منطقية ما دام تقدر تدفع 80 و100 مليون في السنة للاعب.. هو كان جاي رقم 5 في مكانه يبقى تقدر ترجع لو عندك ناس بتفهم وبتحب المكان بس وبتفكر صح.. بعيدا عن تفكير الإدارة الضعيفة اللي لازم يبعدوا عن ملف الكرة نهائيا بعدما أثبتوا فشلهم في 3 فترات قيد للفريق طلعت بلاعب واحد بس".