حرب كلامية بين محمد رمضان وأحمد فلوكس بسبب "صبي الرقاصة"
على ذكر ما أعلنه الفنان محمد رمضان من هجومه على الفنان فاروق فلوكس بشكل ضمني في تصريحه الذي أكد فيه: "هناك ممثل كبير عمل دور صبي رقاصة وأنا مش ممكن أبقي زيه"، بدأت حرب تصريحات كلامية بين رمضان وأحمد فلوكس نجل الفنان الكبير فاروق فلوكس.
وعلى ذكر تلك التصريحات هاجم أحمد فلوكس محمد رمضان بعد سخرية رمضان من أبيه فاروق فلوكس بشأن تجسيده لدور "صبي رقاصة".
ورد فلوكس على تصريحات محمد رمضان مؤكدًا: "شوف يا حماده، انت ترفض إنك تعمل دور صبي رقاصة لأنك دايمًا نمبر وان، فأكيد هتبقى عينك على دور الرقاصة نفسها، مش الصبي بتاعها، وانت ما شاء الله ناجح في ده جدًا وبتعمله سهل وانت عريان ما دريان".
وأضاف فلوكس في منشور كتبه على صفحته الشخصية على موقع "فيس بوك": "نمبر وان بقى يا سيدي، زي بالظبط ما يكون واحد مسجل نشل، استحالة يحلم أن يكون أمين شرطة، حلمه هيكون أكبر من كده، هيكون نمبر وان".
وتابع موضحًا: "أنا والدي عمل دور صبي رقاصة لأنه بيعشق التمثيل والأدوار الصعبة، والحمد لله إنه ربى رجل بيحترم نفسه وبيحترم اللي بيقدمه للناس، وبيحترم بلده، ودمه فداء ليها، لأن شعب بلده هم اللي عملوه فلازم يقدملهم أحسن حاجة، وبحمد ربنا أكتر وأكتر، إن ما خلفش واحد مسجل نشل لأن المسجل هتكون أقصى طموحه أن يكون أسطورة، وهيرقص برضه بس عريان".
واختتم أحمد فلوكس هجومه قائلًا: "وبعدين مش شرط تعمل دور صبي رقاصة، ممكن تكون نجم كبير بس أخلاقك أخلاق صبي الرقاصة، وده الأخطر مع إن والله صبي الرقاصة ولا بيقهر حد ولا بيظلم حد، ولا ليه في سكك الشيوخ والدجل، ولا نصاب ولا بيحكها مع الكبار".
