المطرب أحمد زعيم يتصدر التريند بعد كشفه كواليس عن حياته الشخصية مع " ياسمين عز"
تصدر اسم المطرب أحمد زعيم مواقع التواصل الاجتماعي خلال الساعات الماضية.
جاء ذلك بعدما حل المطرب أحمد زعيم ضيفًا على الإعلامية ياسمين عز في برنامجها كلام الناس، المذاع عبر شاشة قناة MBC مصر، وتحدث خلال اللقاء عن نجاح أغنيته يا عراف، بجانب الحديث عن حياته الشخصية.
وجاء ضمن أبرز تصريحات المطرب أحمد زعيم في برنامج كلام الناس مع ياسمين عز حيث قال: أمي الله يرحمها، أغلي حاجة عندي راحت، هي توفت في وقت يعني أنا تقريبًا مكنتش بقدملها حاجة، ومع الوقت أما ربنا يكرمني، ويحصل نقلة فنية أو مادية، بفتكرها وبقول ياربي نفسي كانت تكون عايشة وده مايوفيش حقها.
كما قال أمي قبل ما تتوفى طلبت مني أبعد عن المزيكا، كان السبب عندها علشان الوقت ده مفيش أي حاجة بتجيلي، وكانت بتقولي إنت بتضيع وقت ونفسك، ولكن كنت عارف هي نيتها إيه.
وأضاف في حديثه: مراتي بتعذرني كتير عشان هي طيبة وحصل مشاكل كتير بسبب المعجبات وده شيء طبيعي، ومتوقع قدام يحصل كتير وبقولها ده شعاع جاي من بعيد وإنتي لازم تستعدي، ولو نفسيتك وحشة بتأثر عليا وعلى البيت.
كما قال: بنتي عندها ماشاء الله التيمبو حلو، ومن وجهه نظري هيبقى صوتها حلوة أوي، في فترة الطفولة ممكن تغني ولكن أول ما تكبر هخاف عليها، أنا كراجل شوفت كتير ما بالك من البنت، حتى المطربات الموجودين على الساحة حصلهم مشاكل وضغوطات كتير مؤكدًا في حديثه: أنا واثق كل أب لكل مطربة بيزعل لما بسمع خبر مش كويس، وده حال الأب والأم أنا ليه ادخل بنتي في ليلة زي ديه.
واختتم المطرب أحمد زعيم تصريحاته كنت مبسوط بتشبيهي بمطرب أسباني، وكان بيجيلي أسئلة زي أنت هندي أو أسباني أو عراقي، وكل دي حاجات حلوة علشان وصلت لقلوبهم وكل واحد بيشبهني ببلده.
